తొలిసారి ఆకాశ మార్గాన పోస్టల్ డెలివరీ..!
- 49 కి.మీలకి 25 నిమిషాలు డెలివరీ సమయం
గుజరాత్, త్రిశూల్ న్యూస్ :
మొట్టమొదటిసారి పోస్టల్ డిపార్ట్మెంట్ కూడా డ్రోన్ సర్వీసులను ప్రారంబించింది. పైలట్ ప్రాజెక్ట్‌లో భాగంగా.. గుజరాత్‌లోని కచ్ జిల్లాలో డ్రోన్‌ను వాడుతూ తొలిసారి పార్శిల్‌ను డెలివరీ చేసింది. 25 నిమిషాల్లో 46 కి.మీల దూరంలో ఈ డ్రోన్ ప్రయాణించి.. పార్శిల్‌ను డెలివరీ చేసినట్టు పోస్టల్ డిపార్ట్మెంట్ అధికారులు వెల్లడించారు. కమ్యూనికేషన్ మంత్రిత్వ శాఖ ఆధ్వర్యం కింద పనిచేసే పోస్టల్ డిపార్ట్మెంట్ కచ్ జిల్లాలో భచౌ తాలూకా సమీపంలోని భుజ్ తాలూకాకు చెందిన హబే గ్రామం నుంచి ఈ డ్రోన్ ద్వారా పార్శిల్‌ను పంపారు. పత్రికా ప్రకటన కార్యాలయం(పీఐబీ) అహ్మదాబాద్ విడుదల చేసిన ప్రకటనలో ఈ విషయం తెలిసింది. ఈ పైలట్ ప్రాజెక్టు విజయం కావడంతో.. భవిష్యత్‌లో డ్రోన్ల ద్వారా పోస్టల్ డెలివరీలను చేపట్టడం కుదురుతుందని పీఐబీ అహ్మదాబాద్ చెప్పింది. ఆధునిక సాంకేతికత పెరుగుతోన్న సమయంలో.. పైలట్ ప్రాజెక్టులో భాగంగా పోస్టల్ చరిత్రలోనే తొలిసారి డ్రోన్ సర్వీసుల సాయంతో కొరియర్‌ను డెలివరీ చేసినట్టు పీఐబీ తెలిపింది. గుజరాత్‌లోని కచ్ జిల్లాలో డ్రోన్ టెక్నాలజీ సాయంతో ఆకాశ మార్గాన ఈ డెలివరీని చేపట్టినట్టు పేర్కొంది. పార్శిల్ డెలివరీని చేపట్టిన ప్రాంతం నుంచి 46 కి.మీల దూరంలో ఉన్న గమ్యస్థానానికి చేరుకోవడానికి 25 నిమిషాల సమయం పట్టిందని పత్రికా ప్రకటనలో పేర్కొంది. మెడికల్‌కు చెందిన పార్శిల్‌ను ఈ డ్రోన్ ద్వారా డెలివరీ చేసినట్టు ట్విటర్ వేదికగా కేంద్ర కమ్యూనికేషన్ మంత్రిత్వ శాఖ సహాయ మంత్రి దేవుసిన్హ చౌహాన్ చెప్పారు. ఈ పైలట్ ప్రాజెక్టులో డ్రోన్ల ద్వారా డెలివరీ చేపట్టినప్పుడు ఎంత ఖర్చవుతుంది, రెండు మార్గాల మధ్య దూరం, ఉద్యోగుల మధ్య సహకారం వంటి పలు విషయాలను పరిశీలించింది. ఈ సమయంలో ఏమైనా ఇబ్బందులు తలెత్తుతున్నాయో కూడా పరిశీలించింది. ఈ ప్రయోగం వాణిజ్య పరంగా విజయవంతమైతే.. పోస్టల్ పార్శిల్ డెలివరీలు మరింత వేగవంతంగా ప్రజలకు చేరుకుంటాయని పోస్టల్ డిపార్ట్మెంట్ తెలిపింది. డ్రోన్ మహోత్సవ 2022 వేడుకల్లో భాగంగా.. పోస్టల్ డిపార్ట్మెంట్ విజయవంతంగా ఈ పైలట్ ప్రాజెక్టును చేపట్టింది. ప్రధాన మంత్రి నరేంద్ర మోదీ దేశంలోనే అతిపెద్ద డ్రోన్ ఫెస్టివ్ భారత్
డ్రోన్ మహోత్సవం 2022ను శుక్రవారం ప్రారంభించారు. వ్యవసాయం, క్రీడలు, రక్షణ, విపత్తు నిర్వహణ విభాగాల్లో డ్రోన్ల వాడకంపై ఈ మహోత్సవం జరుగుతుంది.
Comments
Post a Comment