వైకాపా తుమ్మితే ఊడే ముక్కు.. ఎవరూ భయపడొద్దు - చంద్రబాబు
- నేను కుప్పం రాకూడదనే వైకాపా ప్రయత్నాలు
- యానాదిపల్లె రచ్చ బండ కార్యక్రమంలో చంద్రబాబు
తెదేపా అధినేత చంద్రబాబు పర్యటన కుప్పం నియోజకవర్గంలో మూడోరోజు కొనసాగుతోంది. కుప్పం మండలం యానాదిపల్లిలో రచ్చబండ వద్ద చంద్రబాబుకు గ్రామస్థులు ఘన స్వాగతం పలికారు. ఈ సందర్భంగా చంద్రబాబు గ్రామస్థులనుద్దేశించి ప్రసంగించారు. ఒకప్పుడు కుప్పంలో కనీస సౌకర్యాలు ఉండేవి కావు. తెదేపా పాలనలో అభివృద్ధి పనులు చేస్తూ వచ్చాం. విద్య, మౌలిక సదుపాయాలు కల్పించాం. మారుమూల గ్రామాల పిల్లలు సైతం ఉన్నత ఉద్యోగాలలో ఉండటం సంతోషం కలిగిస్తోంది. నార్త్‌ కొరియాలో కిమ్‌ ఉన్నట్టు మనకు ఇక్కడ జగన్‌ ఉన్నారు. మనపై దాడి చేసి మనపైనే కేసులు పెడుతున్నారు. నేను కుప్పం రాకూడదనే వైకాపా ప్రయత్నాలు. అందుకే మన క్యాడర్‌పై అక్రమ కేసులు పెడుతున్నారు. అన్నం పెడుతుంటే కూడా దాడులు చెయ్యడం ఏంటి? పోలీసులు నిన్న కుప్పంలో రౌడీల్లా వ్యవహరించారు. 22ఏళ్ల తెదేపా హయాంలో ఇలా చేసి ఉంటే ఏం చేసేవాళ్లు? వచ్చే ఎన్నికల్లో మళ్లీ తెదేపా వస్తుంది.. అందులో అనుమానమే లేదు. పోలీసులు గుర్తు పెట్టుకోవాలి. ఉన్మాది చెప్పాడని పోలీసులు పనిచెయ్యకూడదు. మొన్నటి వరకు కుప్పంలో చిన్న గొడవ చేయాలంటే భయపడేవాళ్లు. ఇప్పుడు ఇతర ప్రాంతాల నుంచి రౌడీలను తీసుకొచ్చి గొడవలు చేస్తున్నారు. వైకాపా తుమ్మితే ఊడే ముక్కు.. ఎవరూ భయపడాల్సిన అవసరం లేదు అని చంద్రబాబు స్పష్టం చేశారు.
Comments
Post a Comment